«Жемқорлық – дерт» атты флеш-моб

6 наурызда «Адал ұрпақ» еріктілер клубының жұмыс жоспарына сәйкес оқушылар арасында сыбайлас жемқорлыққа қарсы мәдениетті қалыптастыру, адалдық пен әділдік құндылықтарын дәріптеу мақсатында «Жемқорлық – дерт» атты флеш-моб ұйымдастырылды.

Іс-шара барысында қатысушылар сыбайлас жемқорлықтың қоғам дамуына кері әсерін түсіндіретін ұрандар мен үндеулер айтып, адалдық пен заңдылықты насихаттайтын көріністер көрсетті. Флеш-мобқа қатысқан оқушылар «Адалдық – ардың ісі», «Жемқорлыққа жол жоқ!», «Болашағымыз – адал қоғам!» сияқты ұрандар арқылы өз көзқарастарын білдірді.

Шараның негізгі мақсаты – жастардың сыбайлас жемқорлыққа қарсы азаматтық ұстанымын қалыптастыру, құқықтық сауаттылығын арттыру және қоғамда адалдық қағидаттарын насихаттау болды. Флеш-моб жоғары деңгейде ұйымдастырылып, қатысушылардың белсенділігі мен жауапкершілігін арттыруға ықпал етті.

Қорытындысында оқушылар жемқорлықтың кез келген түріне қарсы тұру әрбір азаматтың міндеті екенін түсініп, адал қоғам құруға өз үлестерін қосуға дайын екендіктерін көрсетті.